បន្ទាយមានជ័យ៖ នគរបាលខេត្តបន្ទាយមានជ័យបានឃាត់ខ្លួនជនជាតិថៃ ៣នាក់ រួមនឹងដកហូតវត្ថុតាងថ្នាំញៀនសរុបចំនួន ១២៨ថង់ ស្មើនឹងទម្ងន់ ៣៧២ក្រាម ទូរស័ព្ទ ២គ្រឿង និងសម្ភារៈមួយចំនួនទៀត។ ការឃាត់ខ្លួនធ្វើឡើងកាលពីយប់ម៉ោង៩ ថ្ងៃទី៨ ខែមិថុនា ឆ្នាំ២០២២ ក្នុងក្រុងប៉ោយប៉ែត។

ស្នងការរងទទួលបន្ទុកគ្រឿងញៀន លោក ធិន ស៊ិនដេត បានឱ្យដឹងថា ដំបូងសមត្ថកិច្ចបានឃាត់ខ្លួនជនសង្ស័យជាជនជាតិថៃម្នាក់អាយុ ២២ឆ្នាំ និងម្នាក់ទៀតអាយុ ២៥ឆ្នាំ ពាក់ព័ន្ធនឹងម្សៅក្រាមសថ្លាចំនួន ៧ថង់ និងបន្តឈានទៅឃាត់ខ្លួនមេខ្លោងម្នាក់ទៀតជាជនជាតិថៃ អាយុ ៣៦ឆ្នាំ នៅក្នុងអគារស្នាក់នៅរបស់បុគ្គលិកជាន់ទី២ បន្ទប់លេខ A5 ស្ថិតក្នុងភូមិក្បាលស្ពាន សង្កាត់/ក្រុងប៉ោយប៉ែត ខេត្តបន្ទាយមានជ័យ។

បច្ចុប្បន្នជនសង្ស័យទាំង ៣នាក់ រួមទាំងវត្ថុតាង នគរបាលការិយាល័យ ប្រឆាំងគ្រឿងញៀន កំពុងរៀបចំសំណុំរឿងបញ្ជូនខ្លួនទៅសាលាដំបូងខេត្តបន្ទាយមានជ័យ ដើម្បីចាត់ការតាមនិតិវិធីច្បាប់៕